【 自助餐 放蛇卧底组 】文华东方 10大必试 3大中伏 甜

知道香港人锺意食Buffet，我哋决定化身「 自助餐 鬼见愁」，将城中 自助餐 完全起底！好坏无所遁形！最近听讲快船廊的Buffet dinner有个甜品阵，内有超过40款甜品，简直係冲着全港女性而来，挑战你的胃口和卡路里！究竟质素如何？我哋就派人去会一会呢个甜魔，同你来个汇报。

现场目测浮夸甜品阵

甜品分两层摆在眼前，加埋雀仔、鸟笼、花朵砌得靓靓，成个花园咁，绝对是影相呃Like、Selfie之选。网上盛传共有48款甜品咁多，即刻要求主席点甜品数先！当日就数到37款，部份甜品有重複，好彩类别都算多，朱古力、布甸、Cheesecake、鲜果都有一系列选择，斋食甜品都饱。雪糕仲係文华东方自家製，诚意满分！

与其说呢棵係士多啤梨树，不如话佢係一个红色炸弹。一粒粒士多啤梨用牙籤串好，一拔出嚟就食得，够方便。不过直接插在发泡胶波上面，真係令人有些少犹豫，会唔会包张保鲜纸好啲呀？

同场另一炸弹，上面插住的是双色棉花糖；仲有贝壳蛋糕巨塔，全部冲击你的视觉。

部分甜品仲隐藏喺呢个花园入面，好似这朵Macaron花、香槟啫喱杯和不同款的松露朱古力咁，要细心啲搵呀。

其实37款甜品真係逼死人！花多眼乱拣唔到之余，食晒又怕肥，点算好？即睇以下甜品Top 10来个精华游。

No. 1 层层叠雪糕

高水準的自家製雪糕，厚身软滑，好重奶香，冰感都足够，重点是可以叫甜品师傅帮你整个双球、多球雪糕，好食又好玩。

No. 2 香草焦糖炖蛋

微微烧至脆卜卜的焦糖，配上Creamy、滑溜的炖蛋，好好味，师傅要不停Refill。

No. 3 柠檬松子仁馅饼

酥香牛油皮，同内里酸酸甜甜的柠檬馅好夹，记者最锺意呢个！

No. 4 焗苹果挞

苹果煮得很软身，好香肉桂味，连埋牛油脆皮，口感丰富。

No.5 蓝梅Cheesecake

文华东方的招牌甜品，实在无得输，浓浓芝士味，唔会整得太实，食落唔腻。

No.6 日本雪梨Cheesecake

雪梨好清甜，整件蛋糕味道好清新，是不嗜甜朋友的轻怡之选。

No. 7 热情果Cheesecake

食得出用了很浓缩的热情果汁来做，酸酸地几解腻。

No.8 Tiramisu

软滑的Mascarpone cheese中渗出咖啡香及rum酒味，齿颊留香。

No. 9 芒果布甸

芒果肉很多，而且好香，味道唔假，加埋椰汁西米，非常泰国style。

No. 10 朱古力慕斯

朱古力酱再加两层不同浓度的慕斯，味道好rich！朱古力迷必食！

世事无完美，所以甜品都有陷阱。以下呢三款都算係这个甜品阵的败笔，大家小心。

1. 扮绵花石膏糖

话明係绵花糖，照道理应该是软绵绵，一咬feel到唔对路，硬到敲落碟都有「咯咯声」，而且无甜味，非常奇怪。

2. 药水味浓　士多啤梨蛋糕

士多啤梨甜品向来都是伏味浓之选，因为真係好易变成药水味，这款就係其中之一，唯一可以说的就是海绵蛋糕部份几软熟。

3. 硬过石头窝夫

本想讚一讚窝夫有多种酱料可拣，港式格仔饼三宝有齐，点知食落好硬好乾，完全无格仔饼应有的湿润蛋糕质感，扣晒分！

讲返 自助餐 的其他部份，冻海鲜的选择非常多，除了基本的冻虾、蟹脚、青口之外，仲有龙虾、鲍鱼、生蚝，难怪六点半一开始就排长龙抢海鲜，好彩厨师们都Refill得快，抵讚！

不过全部犯下一个通病！就是淡而无味，新鲜度足够，但完全食唔出海鲜应有的鲜甜味，有点失望。反而即切刺身有惊喜，三文鱼肥美厚身，啖啖鱼油香，带子也非常鲜甜，要一再Encore。

热食方面都有十多款可供选择，大部份以中式为主，最近仲玩怀旧主题，有沙田鸡粥及烧乳鸽。虽然很欣赏厨师谂主题的用心良苦，但两者味道平平无奇，唔算突出，而且有几多人会在 自助餐 食粥呢？

每人奉送慢煮鹅肝一件，味道甘香啖啖邪恶油脂，若果可以无限任食就更开心。

总分：8 / 10

总括而言，这顿 自助 餐属高分之作，甜魔攻击确实邪恶，款式比一般 自助餐 甜品还要多，味道也符合酒店级水準；热食方面味道不错，无乜中伏。唯一要改善的地方是冻海鲜淡而无味，生蚝若然是即开就更好，环境亦比较迫，听到晒旁边食客讲紧乜，有啲嘈。不过$548食到高质的美食，仲要超多靓甜品，真係抵到笑！

快船廊

地址：中环干诺道中 5 号香港文华东方酒店阁楼

供应时间：

6:30pm – 10:30pm (星期一至四)

6pm – 8pm ; 8:30pm – 10:30pm (星期五、六及公众假期)

6:30pm – 10pm (星期日)

收费: 成人 $548 小童 $368 (星期一至四)

成人 $588 小童 $398(星期五至日及公众假期)

*另设加一服务费

【延伸阅读】

$168任食 点心 连鲍鱼一只！四小时回本放题 【铜锣湾】

【扫街王】 尖沙咀 歎最Elegant小食甜品